Ds Mari het immer gsäit, miär sind da zum glicklich syy. " Ja rächt hesch!"
Ein Sagenhafter Erzählabend
Von und mit Rita Clara Furger
mit Gitarrenklängen aus der Büchse von Felix Gisler
"Wäisch miär sind da zum Gliichlich syy", het äs gsäit,
und miär uf d Schulterä klopfet, zum Glick hent myni Zänd besser gha
.und ds Mari wäiss de, vo was äs redt.
Martha isch my Namä.
Püürin us Üri, oder besser gsäit, ich bi Püürin gsy.
Ds Elsi isch myni Liäblingschuä, oder besser gsäit isch myni Liäblingschuä gsy. Dr Jakob isch my Ma, oder besser gsäit, isch my Ma gsy. Doch vor äiniger Zyt sind beedi gstoorbä, doch wiä isch das scho wider mit dèrä Zyt; git si äs wirklich...?
Üfgwaxä bin ich uf em Hogeregg. Ds Hogeregg isch ä Hoger gsy uf em Egg ussä , drum Hogeregg. Ich wäiss äu nit, warum si das Hüüs uf ds Egg gstèllt hènt und nid ufä Hoger. Hätt ja weniger zoogä det obä, uf em Hoger ass uf em Egg ha n ich gsäit am Sepp, mym Nachbüür.
Dèr hed uf em Grozänegg gwoont, das isch äs Egg gsy min är ä Grotzä drüff . Miär hènt nä immer azundä, ob ächt är diä Grötzä syg.